Im Wettsträit um dä schenste Baam war datt äne Doref  wierer ganz vore. Do hott aach in däm anere Doref datt technische Äquipment, datt wo se for se transpodere unn uffsestelle genomm harre, aach näist genutzt. Zu allem Iwel hott dann dä mickrich Baam am nächste Daach abgeschniet uffem Trottewa gelähn. Käner wäs watt genaues nitt. Awer enn noue muußt jetzt dringend her, greßer unn scheener als dä Quaggert vorher. Mit däm noue kinne se sich jetzt schunn mit däm, dä wo im anere Doref steht, messe, awer nore fast.
Dann verschwind datt gäle Ortsschild in däm äne Doref. Datt noue, drangeschroude sullt wuhl verwirre, iss awwer nitt gelung. Vielläicht honn die Louserder, die wo watt druff geschrieb honn, aach nitt ganz verstann warret hääse sullt.
Do sull doch tatsächlich aach enn Kriminaler do gewääs sinn, um mool Liecht in datt Dunkel der Mainaacht rinnsebrenge. Awer bevor dä erscht rischtisch angefang hott mit se rescherschere, wa datt Schild wierer gefund. It wa wuhl in däm anere Doref stulz präsendert wor. Dann horret jemand gut sichtbar irgendwo an änem dicke Hulzposte festgeschrout. Wa datt nou enn ehrlicher Finder orer äner mittem schlächte Gewisse ... 
Awwer it geht noch wäirer. It noue Naturschwimmbad in däm äne Doref kunnt wuhl aach käner läire. Datt Wasser hott so enn Dunnerkäil abgeloss unn sich, laut änem uffmerksame Zeuge, dä wo datt gesiehn hott, mittem gäle Auto ousem Staab gemach.
Dä Versuch vunn däne annere in däm äne Doref dä Baam abseschnäire is kläglich geschäirert. Allderweil die äne vorgesorischt harre unn enn dick Auto voredran gestalt. Do wa die Coraasch vunn däne anere ganz schnell verfloh.
Gähedarstellunge zu all däne Vorkommnisse vunn däm anere Dorf, die wo mer hie nohläse kann, sinn mit Vorsicht se genieße.
Awer datt ganze Palaver is hordisch vergess unn datt nächste Bier trinke datt äne unn datt anere Doref wierer sesamme. Dann vertran se sich wierer.

Noch ebbes: Bese Zunge behaapte sogar, datt die ere oohscherische Baam (sowatt iss frieher genomm wor for die Stroß se kehre) selwert abgeschniet honn, allderweil se sich wuhl geschamt harre mit däm Quaggert.